Thiamna tak tak nei tura zir chhuah a pawimawh ber - C Lalsawivunga

Minister C Lalsawivunga chuan, khawvelah thiamna a hlu tial tial a, zirlaite tan zir chhuak satliah ni lo, thiamna tak tak nei tura zir chhuah a pawimawh ber thu a sawi.

Bethlehem Vengthlang Branch YMA-in an veng mi HSLC leh HSSLC pass tharte an lawmpuina a hmanpuinaah C Lalsawivunga chuan, "Zir chhuak satliah ni lo, thiamna tak tak nei tura zir chhuah hi zirlaite tana pawimawh ber. Competition a san tawh avangin a thiam thiam an tling tawh a, induhsak theih a ni tawh lo. He sorkar hian duhsak a nei thiang lo a, a thiam thiam tlinna, merit-in sorkar a kal tawh," a ti.

Tunlaia thiamna changkang leh hmanruate a ṭangkai zawnga hman a pawimawh thu sawiin Minister chuan, "Mobile phone-te hi milem dukdaklo enna tur a ni ringawt lo a, kan zirlai min puitu atan ṭangkai taka hman kan tum tur a ni," a ti a; nu leh pa thuawih chu hlawhtlinna leh dam reina a nih avangin nu leh pa thu awih turin zirlaite a chah.

Bethlehem Vengthlang YMA hian kuminah HSLC zo mi 127 leh HSSLC zo mi 90 an nei a, lawmpuina thilpek an hlan a ni.