Saitual DC-in 'Keifang Dry Area' a puang

Keifang chu zu leh ruihhlo dang awm lohna ni turin nimin khan Saitual DC C Lalpeksanga'n a hawng a; hemi pual hian nimin khan Keifang khaw chhungah zu leh ruihhlo dang ûmbo tuma beihpui an thlâk mek pualin kawng an zawh.

Kawngzawh hi chawhma dar 10-ah ṭan a ni a, Keifanga YMA branch pathum - Venghlun, Venglai leh Leitan branch aṭangin zirlai, zirtirtu leh mipuiin ruihhlo dona leh an duh lohna thu chi hrang hrang ziahna banner leh poster an keng lang. Kawng zawhtute chu Keifang Dawrkàwnah intâwk khawmin inkhawm neih a ni a, bawrhsap C Lalpeksanga'n 'Keifang Dry Area' chu a hawng a ni.

Bawrhsap chuan, Keifang mipuiin ruihhlo an duh lohzia an lantir chu a hria apiangte'n zahsak se a duh thu sawiin, khaw thianghlim leh rálmuang, entawntlak an nih a, zu leh ruih­hlo do kawnga an hmalakna chu a hlawhtlin ngei theih nan duhsakna a hlan. Saitual district chu ding tìr chauh a nih avangin sorkar lam aṭangin duh anga puihna a awm thei lo tih sawiin, pawi a tih thu a sawi bawk.

Saitual SP PC Lalduhthlanga chuan, Keifang Chhantu Pawl (KCP) hmalakna fakawm a tih thu a sawi a, "Vawiin hi a bul ṭanna a ni a, a hlawhtlin hma chu a tàwp thlengin i ṭang ang u. Chhungkuaah inzirtirna kan kalpui chhunzawm loh chuan a zîktluak lo ang tih a hlauhawm. Police-te pawhin kan tih theih apiangah theihtawp kan chhuah zel dawn a ni," a ti.

Excise & Narcotics department-a officer in-charge Vanlal­vura Ralte pawhin thu sawiin, Keifang Chhantu Pawlte chu teirei peih tura a fuih rualin, dan hnuaiah kal hrâm hrâm turin a chah. Keifang V/C president PC Lalremruata chuan, Keifang khawtlangin zu leh ruihhlo an hnê tawh tih sawiin, "Pathian zarah kan hneh zel dawn a ni," a ti a; dry area puanga an hmalakna tur chu a huphurhawm loh thu a sawi.

Keifangah hian zu leh ruihhlo zuar chhungkaw 40 vel an awm avangin khawtlanga hruaitu, tlawmngai pawl leh kohhran hrang hrang hruaitute kal khawm chuan tihrêm ngei ṭulin an hria a, Keifang Chhantu Pawl (KCP) dinin, October 3, 2019 aṭangin chhum lo chat loin duty an indah a ni. Kohhran hruaitute pawh zu leh ruihhlo zuar ṭhinte inah léngin, ṭawngṭaina nen vawi tam tak hun an hmang tawh bawk.

KCP hian hma an lak tawh chînah mi pariat lakah thubuai an siamtir tawh a, rakzu litre 180, zu fûn 190, zu kaihhnawihah bel set sarih leh zu siamna hmanrua eng emaw zat an man tawh a ni.