Cooperation Minister-in hardware a sem

Cooperation minister PC Vanlalruata chuan nimin khan RCS conference hall-ah Computerisation of Primary Agricultural Credit Cooperative Societies (PACS) Phase-II hnuaia centrally sponsored project kalpui mekah hardware a sem a; Mizoram Cooperative Policy chu sorkar laipuiah thehluh a nih thu a sawi.

PC Vanlalruata chuan, Mizoram sorkarin society-te a ngaih pawimawh thu sawiin, "Society-te hmasawn zelna atan Chief Minister pawmpuinain Ministry of Cooperation hnenah Mizoram Cooperative Policy kan duan kan thehlut tawh a, coopera-tive society-te'n sorkar aṭangin a tlem berah Rs 1,00,000 tal puihna an dawn theihna tur scheme a ni. Sorkar laipuiin a tihlawhtling a nih chuan Mizorama coopera-tive society-te tan a ṭangkai hle dawn," a ti.

Cooperative society-te chu ram hmasawnna tura pawimawh ber zinga mi an nih thu sawiin Minister chuan, "Hardware in dawnte hi khawvel hmasawn zelin a ken tel digitaization lama hma in sawnna tur kailâwn pawimawh a ni," a ti a; hardware an dawnte chu ṭangkai taka hmang tur leh Mizoramin hmasawnna rahbi thar a chuankai theihna atana entawn tlak nih tum turin a chah.

Khualzahawm Cooperation secretary Udit Prakash Rai pawhin thu sawiin, Mizoramah primary agricultural credit society (PACS) 270 vel an awm mek thu leh, PACS 270-te'n computer an neih vek theih nan thawh a inhuam thu a sawi.

Computerisation of PACS Project hi Ministry of Cooperation hnuaia centrally sponsored project kalpui mek niin, phase II-ah hian computer dawng turin PACS 24 thlan an ni a, field verification pawh tih zawh tawh a ni.

Hardware semte hi sorkar thu ding lai angin GeM Portal kaltlang veka supplier-te hnen aṭanga lei a ni a; supplier chu Saaj Venture, Dimapur, Nagaland a ni. Bungraw semte hi desktop HP pro tower 280 G9, inverter, dot matrix passbook printer, HP laser printer, thermal printer, fingerprint scanner, barcode scanner, POS machine, webcam leh tablet te a ni.