CM leh Union Minister an inkâwm

Sorkar laipuia Panchayati Raj leh Fisheries, Animal Husbandy & Dairying enkawltu Rajiv Ranjan Singh chu Mizoramah a rawn zin a, May 24, Pathianni tlai khan chief minister Lalduhoma nen Chief Minister Banglaah an inkâwm.

Inkawmnaah hian Fisheries leh Animal Husbandry and Veterinary department-a Mizoram mamawh hrang hrangte an sawi dun a; Union Minister hi Fisheries, Animal Husbandry & Diarying minister of state George Kurian leh official dangte'n an ṭawiawm.

Rajiv Ranjan Singh chuan, Mizoramin mamawh a thlen tawh - Wholesale Fish Market sakna te, Integrated Aqua Park sakna tur te, Paddy cum Fish Culture district tam zawka cluster kalpuite chu tihhlawhtlin a tum thu CM Lalduhoma a hrilh. Mizoram chu sanghaa intodelh mai lo a, thawn chhuak thei khawpa a hlawhtlin theih nan project thehlut tura chahin, an lo ṭanpui tur thu a sawi.

Sangha dil thar laihna te, a awm sa tihlen leh cheina te, sangha khawitute ṭanpuina lama hmalaknate chu Prandhan Mantri Matsya Sampada Yojana (PMMSY) 2.0-ah telh tum a nih thu sawiin Union Minister chuan, "PMMSY 2.0 a chhuak thuai dawn a, Mizorama a kalpui dan tur ṭha in mamawhte chu rawn thehlut u la, PMMSY 2.0-ah bilh luh kan tum dawn nia," a ti.

CM Lalduhoma'n Milk Processing Plant dinna tur a thlen chungchangah Ranjan Singh chuan, "State share-a 25 a ni ṭhin kha scheme tharah central leh state share 90:10 a ni tawh dawn a, in project-te scheme thara thun tura tih a ṭhain a rinawm," a ti a; Mobile Veterinary Unit atan Mizoram mamawh zat pek an tum thu a sawi.

Union Minister chuan, Mizoram tan Transport Subsidy for Animal Feed bawhzui an tum thu sawiin, "Ran chaw lam hi chu Mizoramah nasa zawkin kalpui u la a ṭha berin ka ring," a ti.

Chief Minister hian Mizoram a tlawh avangin Rajiv Ranjan Singh chu lawmthu hrilhin, Mizoramin a hlawkpui ngei a beisei thu a sawi a, hun nuam tak hmang turin duhsakna a hlan. CM hi minister pahnih C Lalsawivunga leh Lalthansanga ten an ṭawiawm a ni.