KHAWTHLIR

Ruang phurh man pe chhuak

Mizoram sorkarin khualkhuaa thite ruang phurh man a tumsakna, Assistance for Transportation of Bodies of Deceased Persons within Mizoram kaltlangin May 1-22, 2026 chhung khan ruang 154 phurh man atan sorkarin Rs 10,63,813 a pe chhuak. Ruang phurh man pek tawh 154 zinga 13 chu online (Ruangphurh App) kaltlanga dilna lut a ni.

SCC tam zawkah sawhthing hralh zo

Khawzawl district bawrhsap K Vanlalṭhiana hoin nimin khan District Agriculture Marketing Committee (DAMC) chuan Khawzawl district-a sawhthing hralh kalpui dan an thlir. Secondary collection centre (SCC) tam zawkah sawhthing hralh tur a awm tawh loh thu tarlan a ni a; loneitu zinga sawhthing thar tam ber leh supervisor thawk ṭha ber lawmman buatsaih an rêl.

Ruihhlo do sawiho

Kolasib bawrhsap H Dolianbuaia hoin nimin khan District Narco Coordination Centre (NCORD) an ṭhukhawm a; ruihhlo donaah thawhhona ṭha zawk leh hmalak dan tur ṭha zawk an neih theih dan tur an sawiho. Ṭhutkhawmah hian Police leh END hotu te, Chief Medical Officer, Sub-Headquarters YMA aiawh, ruihhlo ngaite enkawlna (rehabilitation home) hrang hrang aiawhte leh District Drug Inspector te an tel a ni.

Car chesuala thite vui liam an ni

May 23, 2026 Inrinni zana Lunglei leh Hauruang inkara car chesuala thite chu nimin khan vui an ni. Hyandai i10 car MZ-02 A-5769 car chesuala thite hi Jerry Lalnunfela (40) s/o R Lalzuimawia, Lalhlimpuia (25) s/o K Rammawia leh, Lalrintluangi (22) d/o Zodingliana, Hauruang khua vek an ni.

AR hotu berin tlawh

Assam Rifles chuan Aizawla AR 23 Sector hmunpuiah UPSC coaching an kalpui mek a; coaching-a kal zirlaite chu nimin khan Assam Rifles hotu ber director general Lt Gen. Vikas Lakhera-a'n a tlawh. Lt Gen. Vikas Lakhera-a'n zirlaite chu duhsakna hlanin, UPSC exam-ah tlin ngei tuma theihtawp chhuah turin a fuih a ni.