Aizawl district-ah vawk lâk luh khap

Aizawl district magistrate Vanlalngaihsaka chuan October 29, 2019 khan Cr.PC Section 144 tlawhchhanin thupek (order) a chhuah a; Aizawl district chhúngah district páwn lam aṭangin Aizawl District Magistrate phalna la hmasa lo chuan vawk, vawksa leh vawksa aṭanga thil siam reng reng lak luh khap a nih thu a puang.

Thupek hi thla hnih chhung atana puan a ni a; vawk natna African Swine Fever (ASF) leh Porcine Reproductive & Respiratory Syndrome (PRRS)-te Aizawl district-ah a lèn hlauhthawnna vangin September 19, 2019-a AH&Vety department hriattirna lehkha bawhzuiin order chhuah a nih thu tarlan a ni.

Vawk chungchangah hian tun hnai khan AH&Vety secretary Lal­thang­puia Sailo chuan thuchhuah a siam a, chu chu October 24, 2019 khan sorkar press release-ah tarlan a ni. Mizo Kristiante hunpui a hnai a, vawksaah Mizoram a intodelh dawn lo tih hriat a nih avangin mipui harsatna tawh theihte hriat­thiampuiin Mizoram sorkarin harsatnate a kian theih nan ruahmanna a siam thu an tarlang.

AH&Vety Secretary thuchhuaha a lan danin, ram dang (foreign) aṭanga vawk lak luh chu khauh leh khawng taka khap a la ni zel a; India ram state dang, PRRS leh ASF lèn lohna hmun aṭang erawh chuan vawk lak luh phal a ni.

PRRS leh ASF lèn lohna state aṭanga vawk la lut tur chuan Commerce & Industries Director aṭanga vawk lak luh phalna dil tur a ni a, chumi hma chuan AH&Vety Director remtihna lak phawt tur a ni. Vawk puitling, talh tur chi chauh lak luh phal a ni a, vawk lakna/leina tur farm aṭangin registered vety practitioner siam proper soundness certificate neih tur a nih bakah, vawk lak luh turte chu AH&Vety checkgate-ah endik vek zel tur a ni. Vawk la luttute'n an lak luh zat leh lak luh ní ziakin AH&Vety Director-ah hriattir zel tur a ni bawk.