Aizawlah Chavang Kût hman a ni

Nimin khan R Dengṭhuama Hall, Mualpuiah 'Chavang Kût' hman a ni a, Home minister Lalchamliana'n a hmanpui. Minister hlui C Chawngkunga chu Kut Pa niin, ZORO president R Sangkawia chu khualzahawm a ni a; hnam làm leh zai chi hrang hrang entir a ni.

Minister Lalchamliana chuan, Chavang Kût hman chu Kuki-Thado te tan chauh ni loin, Zo hnahthlak hrang hrangte inpumkhatna tur a nih thu sawiin, "India rama Zo fa hrang hrangte hian eng emaw huna inthuam­na tur inang siam ni se, Myanmar lama kan unau hrang hrang awm khawmte pawhin an nei a ni," a ti.

Lalchamliana chuan, "Zo fate hi ramriin min ṭhen hrang mah se, chhungrilah inngaih rûkna kan nei a ni," a ti a; insuihkhawm leh turin sorkarin hma a lak thu leh Zo fa zawng zawng huap kût nei turin ruahmanna a kal mek thu a sawi.

ZORO president R Sangkawia chuan, "Hmun hrang hranga kût hmangtute, a bik takin Manipur lama mite hre rengin hlim tak leh Zo fate inpumkhatna kût a ni tih hre rengin i hmang ang u," a ti a; Prof. J Doungel, Mizoram University-in Chavang Kût chhuah dan tlangpui a sawi bawk.

Manipur leh Assam-a Zo fate pawhin Phaituol Temenglong district, Manipur-ah Chavang Kût an hmang a, thupui chu 'Mo­ving forward with unity & culture' tih a ni. Zoram Thar president Rev Dr Zaichhawna Hlawndo-in a hmanpui a, Zoram Thar chuan kum 2020-ah Zo fate haw rûnpui, inkhawmpui thianghlim huaihawt an tum thu a sawi.

Chavang Kût hi Manipur-ah chuan kum 1980 vel aṭangin hman ṭan a ni a, kum 1986-ah Manipur sorkarin kût ní, November 1 chu state holiday-ah puangin, Manipur-ah chuan Zo fate kût ropui ber leh hlimawm ber a ni. Chavang Kût hi Chin-Kuki-Mizo awmna hmun hrang hrang - New Delhi, Bangalore, Kolkata, Chennai, Guwahati, Shillong, Nagaland, USA, England, Australia, Malaysia leh Singapore-ahte pawh hman ṭhin a ni bawk.