MPC Vice President tharin an Policy tihhlawhtlinpuiah a sáwm

MPC party general headquarters chuan nimin khan an vice president thar Chalthangluaia hoin an pisaah inhlan tharna hun an hmang a; Chalthangluaia chuan, Mizoram a tluchhe mek nia sawiin, din thar leh turin MPC policy tihhlawhtlinpuiah Mizoram mipui a sáwm.

MPC Vice President thar chuan, "MPC party po­licy leh programme chauh hi ṭhalaite harsatna sutkian nan leh kan ramin harsatna lian tak tak a tawh phuhrûk nan a ruahman a ni tih hre thar leh a, kan ram tluchhe mek din thar leh turin MPC party policy tihhlawhtlinpuiah Zoram mipui ka sáwm tak meuh a ni," a ti.

Chalthangluaia chuan, MPC president Lalhma­ngaiha Sailo thachhang dâwl turin theihtawp a chhuah dawn tih sawiin, "MPC-in harsatna hrang hrang a tawh laia rinawm leh nghet taka MPC vuan tlattute hi kan ram leh hnam hmakhua ngaitu dik takte an ni. Heng mi rinawm tlatte zarah kan ramin mipui mamawh sorkar ṭha kan la nei ngei dawn a ni," a ti a; MPC dintu Brig. T Sailo policy leh programme ‘Six Basic Needs’ tihhlawhtlin a nih theih nan ṭhahnemngai taka inbuatsaih turin an party mite a chah.