Aizawlah Solar Month hmang

Nimin khan Secretariat complex-ah nizung chakna hman ṭangkai zelna tura PM Surya Ghar: Muft Bijli Yojana (rooftop solar installation) inhriattirna leh Solar Month hman a ni a; khuallian Power & Electricity minister F Rodingliana chuan, Mizoram ṭhan zelna atan kawlphetha a pawimawh thu a sawi.

Solar Month hmannaah hian Secretariat conference hall-ah inkhawm buatsaih a ni a; Secretariat tualah solar vendor-te inbunin, rooftop installation chungchang hre chiang duhte'n an zawhfiah theih turin an ṭhu a ni.

F Rodingliana chuan, Mizoramin a mamawh ber chu mahni intodelh tura hmalak a nih thu sawiin, "Hemi kawnga kan mamawh ber pakhat chu kawphetha a ni. India ramah Mizoram hi PM Surya Ghar-ah pakhatna a ni mek a, a lawmawm tak zet. Kan ramin leilung nghênga thar chhuah hrang hrangte dahṭhat leh sawngbawlna lama hma a sawnna turte leh industry lama hmasawn nan kawlphetha kan mamawh em em a ni," a ti.

Mizoramin hma a sawn zel theihna turin chak takin hma an la zel tih sawiin Minister chuan, "A bul ṭan nan solar installation tih mek a ni a, sorkar building 70 chuangah rooftop solar dah tum niin, tunah hian 50 vel dah mek a ni," a ti a; kawlphethaa Mizoramin ṭangkai taka a hman theih chu rooftop solar energy a nih thu a sawi.

Solar Month hmanna inkhawm kaihruaitu PE secretary K Lalrinzuali chuan, Ministry of Renewable Energy-in 'Solar Month' atan May thla a puan thu leh, Mizoram chu solar energy siam theihna nei ṭha a nih thu a sawi a; PM-Surya Ghar scheme hnuaia rooftop solar installation neih mek chu mipui hnenah puanzar tam a ṭul thu a sawi bawk.

PM Surya Ghar: Muft Bijli Yojana

* Mahni in chungah sorkar laipui leh state sorkar subsidy hmangin rooftop solar dah theih a ni.

* Central subsidy - 1kWp-ah Rs 33,000, 2kWp-ah Rs 66,000 leh 3-10kWp-ah Rs 85,800.

* State subsidy - AMC Area-ah Rs 12,000/kWp, AMC Area - km 100 bialah Rs 14,000/kWp, km 100-200 bialah Rs 16,000/kWp leh km 200 a pelh chinah Rs 18,000/kWp.

* Phone number 9862527932-ah zawhfiah theih a ni a; pmsuryaghar.mizoram.gov.in leh pmsuryaghar.gov.in ah inziah luh theih a ni.