KHAWTHLIR

MZP-in Tourism an dang zui zel

Tourism Director mawhphurhna la tel tura ruat R Lalrodingi a báng emaw, sorkarin a ruatna order a sût emaw phûtin MZP chuan nimin khan Tourism Directorate-a thawkte pisa kai tur an dang chhunzawm a; sorkar aṭanga an beisei ang thu an la hriat loh avangin vawiinah pawh dan leh an tum. Nimin khan Tourism Directorate-a thawk zingah pisa kai tum an awm lo a, a theih ang angin in aṭangin hna an thawk nia thu dawn a ni.

Thisen pe

Boston Higher Secondary School chuan nimin khan thisen pek rûnpui an huaihawt a; Civil Hospital, Aizawl tan thisen unit 57 an pe a, petute mipa 46 leh hmeichhia 11 an ni.

Chawimawina hlan

Assembly speaker Lalbiakzama chuan May 25, Thawhṭanni khan a bial Chalfilh constituency chhunga HSSLC 2026-a distinction-a pass-te hnenah chawimawina a hlan. Speaker hian a biala topper pathum hnenah sorkar hnaa an inziah tlin theihna atan coaching fee a tumsak dawn a; Tlanglian Academy Online Coaching-ah an kal dawn a ni.

Training buatsaih

Chief Minister's Special Package phase-II dawngtu tan nimin khan Lawngtlai DC conference hall-ah orientation training buatsaih a ni. He hun hi district bawrhsap Donny Lalruatsanga'n a hmanpui a, AH&Vety department hnuaia progress partner atana thlan mi paruk hnenah certificate leh placard a hlan.

Computer sem

Hnahthial district bawrhsap K Vanlal-ruati chuan nimin khan Rashtriya Gram Swaraj Abhiyan hnuaiah Hnahthial district-a village council pali hnenah computer a sem. Bawrhsap chuan, VC-te chu an computer dawnte mimal tan ni lo, khawtlang tana hmang ngei turin a chah.