ZMCH-in Graduation Day an hmang

Zoram Medical College and Hospital (ZMCH) chuan nimin khan kumina MBBS zir chhuakte pualin Graduation Day an hmang a, Health and Family Welfare minister Lalrinpuii'n hmanpuiin, ZMCH-a Interventional CT Scan a hawng nghal.

ZMCH aṭanga zirlai zo tharte hi MBBS batch thumna, February 2021-a zir ṭante an ni a, final exam hmachhawn thei zirlai 98 zinga 96 hlawhtlingin, pass percentage 97.95 a ni.

Graduatoin Day-ah hian zirlai ti ṭhate hnenah lawmman hlan a ni a; pakhatna Alex Vanlalruatkima, pahnihna C Lalhmachhuani leh pathumna Zosangpuii te hnenah lawmman hlan a nih bakah, zirna piah lama thil tih hrang hranga ti ṭha ber Paul Ngurthantluanga Vanchhawng hnenah Col VL Ruata Award hlan a ni.

Health Minister chuan, MBBS zo tharte chu Covid-19 laia zirna ṭan ni mah se, ṭha taka an zawh theih avangin a lawmpui thu a sawi a, "Doctor indaih lohna pawh eng emaw chen a phuhruk ngei ka ring," a ti.

Mizoram sorkarin Mizo ṭhalaite'n MBBS an zir theih nan theihtawp a chhuah thu sawiin Lalrinpuii chuan, "Zirtirtu ṭha tak takte a rawih bakah, fee pawh a tumsak," a ti a; MBBS zo tharte chu Mizoramin an thiamnate a mamawh hunah tlanchhe mai lo a, bond (inremna) an ziah chu tipuitling vek turin a chah. Zirlaite hian an zir zawh hnuah kum hnih chhung Mizoram sorkara thawk turin bond an ziak a ni.

HFW Minister chuan, graduate tharte chu an zir zawm dawn a nih chuan Mizoramin a mamawh avangin anesthesiology, biochemistry leh micro-biology lam àwn turin a chah bawk.

ZMCH Graduation Day hi Prof. Zoramthara Zadeng-in a kaihhruai a, khualzahawm TBC Lal-venchhunga, adviser to CM pawhin thu a sawi.

ZMCH hi August 7, 2018-ah din a ni a, a tir aṭangin MBBS zirna hawn a ni. Kum 2025-ah department panga - anaesthesiology, general medicine, general surgery, obstetrics & gynecology leh pediatrics-ah post-graduate zirna hawn a ni a, seat pahnih ṭheuh, a vaiin PG-ah seat 10 a awm.

Mizoram Health Systems Strengthening Project (MHSSP) pro-ject director Dr Lily Chhakchhuak-in HFW Minister-in a hawn tak Interventional CT Scan chungchang a sawi. A sawi danin, CT scan hi MHSSP hnuaia hmalakna niin, cheng nuai 818 man a ni a, artificial intelli-gence hmang a ni a, lung lam ṭha lo, naupang leh cancer enkawl nan a ṭha bika ngaih a ni.