Minister-in behliang chi a vailiam

Agriculture minister PC Vanlalruata chuan nimin khan Agriculture & Farmers Welfare Directorate kawt aṭangin loneitu hnena sem tur behliang chi quintal 245 a vailiam. Minister chuan, behliang mu ro chu price support scheme hnuaiah NAFED-in collection centre-ah minimum support price angin kg-ah Rs 84.50-in an lei vek dawn thu a sawi.

Behhliang chi sem hi Pulses Mission scheme hnuaiah kalpui a ni a, loneitu mi 3,700-te hnenah pek a ni dawn. Vailiamna inkhawm hi Agriculture & Farmers Welfare secretary Ramdingliani'n a kaihruai a; Agriculture Minister bakah director Vanramthangi leh joint director (crops) Ramdingliani ten thu an sawi a ni.

Agriculture Minister chuan, India ram chu bê-ah a intodelh loh thu a sawi a, "Ram dang aṭangin kan mamawh tam zawk lak luh a ni. Sorkar laipui chuan bêa kan intodelh theih nan Pulses Mission a duang a, he scheme hnuaiah hian Mizorama loneitute'n behliang ṭin 6,000-a zauah an chîng dawn. Behliang mu ro hi price support scheme hnuaiah central sorkar agency NAFED-in collection centre-ah minimum support price angin kg-ah Rs 84.50-in an lei vek dawn a ni," a ti.

Behliang chu Mizoram sik leh sa mil a nih thu leh enkawl hautak lo a nih thu sawiin PC Vanlalruata chuan, "A hralhna tur awm sa veka thlai chin hi loneitute tan a phûrawm a, tih tak taka ching leh enkawltute chuan sum tam tak an hai lut thei dawn. Behliang bakah chhawhchhi kg khatah Rs 103 leh nihawi kg khatah Rs 83 hisâpin loneitute thar chhuah ang angte chu NAFED-in an leisak vek dawn bawk," a ti. Behliang, chhawhchhi leh nihawi hmanga loneitute sum lak luh a pun theih nan Agriculture department-in theihtawp a chhuah dawn thu a sawi bawk.