May thlaah Champhai district-ah Ruihhlo vangin mi 37 man an ni

Champhai additional DC Lalbiak-fela hoin nimin khan NCORD Committee an ṭhu a; May thla kal mekah Champhai Police leh Excise and Narcotics department duty-te chuan ruihhlo kaihhnawihah mi 37 manin, thubuai 35 an ziak lut tih tarlan a ni.

Ṭhutkhawma tarlan danin, May 2026 kal mekah Police-te'n NDPS Act tlawh-chhanin mi 13 manin, thubuai pakua an ziak lut a; heroin gram 445, methampheta-mine kg 21.967 leh alprazolam gram 30 an man. Ruihhlo phurhna atana hman lirthei pali an man tel bawk.

May thla chhung vekin Excise & Narcotics department-in ruihhlo vangin mi 24 an man a, NDPS Act tlawhchhanin thubuai 26 an ziak lut. Ruihhlo an mante chu - heroin kg 1.767, methamphetamine kg 1.166 leh alprazolam gram 3.410 a ni.

Assam Rifles-in operation vawi 11 neiin, ruihhlo Rs 7,51,78,250 hû leh meizial cheng nuai 72 hû an man a; Sub-Hqrs YMA-in khawlaia damdawi vawrh ṭhin mi 11 manin, home-ah an dah.

Meeting-ah hian Food & Drug Ad-ministration hotute'n damdawi zawrh phalna (drug license) neitu ni loten phai aṭangin Myanmar-a thawn damdawi an chah ṭhin thu an sawi. Drug license nei loa damdawi zuar kual ṭhinte chu warning pek an nih tawh thu leh damdawi hi license nei pawhin mi in leh office-ahte zawrh phal a nih loh thu tarlan a ni.