ECI Secy hoin SIR chungchang sawiho

Election Commission of India (ECI) secretary Binod Kumar hoin nimin khan Aizawl DC Pisapui Hall-ah electoral roll ennawnna, Special Intensive Revision (SIR) 2026 chungchang sawiho a ni a, SIR buaipuitu sorkar official-te an tel.

Binod Kumar chuan, electoral roll felfai leh thianghlim neih a nih theih nan SIR 2026 kalpui a nih thu a sawi a, "Ram pum nghawng thil a nih avangin a buaipuitute'n taima tak leh felfai taka in buaipui hi ECI chuan a beisei tlat a ni," a ti a; ni nga chhunga enumeration form sem zo hman turin a chah.

Ṭhutkhawma tarlan danin, Aizawl district-a MLA bial 12-ah polling station 324 a awm mek a, rationalization tih hnuah 359 awm tura beisei a ni. Voter 2,92,635 awmin, mipa 1,36,654 leh hmeichhe 1,55,981 an ni a; kum 2005-a voter awm zat chu 1,33,658 a ni. Elector mapped tawh mi 2,18,623 awmin, 74.71% a ni. SIR atan enumeration form 5,85,270 print tawh a ni.

Binod Kumar hian nimin khan Zema-bawk West Middle School polling station a tlawh a; ECI section officer Vijay Gupta leh mi pawimawh dangte'n an ṭawiawm.