Buaina siam leh insual rawn a reh theih nan CYMA-in ngenna a siam

Central YMA chuan, tun hnaia khawlaia buaina siam leh insual rawn a thleng ṭhin chu pawi an tih thu sawiin, a reh theih nan mahni zawn ṭheuha ṭan la turin chhungkaw tin, branch YMA-te leh sorkar an ngen.

CYMA chuan thuchhuah siamin, "Tun hnaiah ṭhalai/râwltharte'n zan lamah insual rawn leh khawlaia buaina siam thawm hriat tur a awm ta fo mai hi pawi kan ti a. Hetiang a nih avang hian kan khawpui hi zan lamah a him ta lo hle niin a lang," an ti.

Khawpuite him tak leh ralmuang taka a awm theihna tur leh, khawlaia insual rawn leh buaina siam a reh theih nan CYMA chuan chhungkaw tinte leh YMA branch-te an huam chhung ṭheuhah ṭan la turin an chah a; sorkara thuneitute pawh theihtawp chhuah turin an ngen a ni.

Buaina a thlen chângin, a rang thei ang bera Police Helpline number 112 leh khawtlang hruaitute hnena thlen vat ṭhin turin CYMA chuan buaina chhuak hmutute an ngen bawk.