KHAWTHLIR

YMA Day ṭanpuina

Central YMA chuan kumina YMA Day pual leh damdawi-in hrang hrang hnenah ṭanpuina sum, 'YMA Day chibai bûkna' pek an tum thu an tarlang. CYMA hian Mizoram páwna Mizo welfare 18 leh Aizawla damdawi-in paruk hnenah Rs 15,000 ṭheuh pek an tum a, a vaiin Rs 3,60,000 a ni. Ṭawngṭai Bethel Camping Centre hnenah buhfai ip 100 leh, TNT Zuangtui leh OKM Home-ah buhfai ip 50 ve ve pek an tum bawk.

AMFU inkhawmpui

All Mizoram Farmers' Union chuan nimin khan Champhai Kahrawt Venga Thangtea Hall-ah General Assembly an hmang a, Champhai additional DC Lalbiakfela'n a hmanpui. AMFU inkhawmpuiah hian chawhnuah rorel a ni a, hruaitu thar an thlang bawk.

Humhalh inzirtir

Mizoram Biodiversity Board leh Nature Learning Centre, Mizoram chuan nimin khan Champhaia Conservator of Forest Auditorium-ah 'Biodiversity Conservation Awareness Campaign' an hmang. Champhaia line department hotu te, khaw hrang hranga Biodiversity Management Committee member te, pawlte leh sikul naupangte an tel a; campaign programme zawhah Champhai Forest Division staff-te’n ramsa rêp, dan loa zawrh an mante hâl a nih bakah, Champhai Nagar Van chhungah thing an phun bawk.

SIR atan inbuatsaih

Mizorama electoral roll Special Intensive Revision neih turah May 22-26, 2026 chhung khan Lunglei district-a Assembly constituency hrang hranga booth level officer (BLO)-te tan training buatsaih a ni. Training-ah hian Lunglei district-a Assembly constituency paruk - Lunglei North, Lunglei East, Lunglei West, Lunglei South, Thoráng leh West Tuipui biala BLO-te an tel a; enumeration form, BLO kit (ip, tuithâwl leh nihliap awmna) sem a ni bawk.