Minister-in PAI 2.0 Report Card a tlangzarh

Rural Development & Administration (RDA) minister Prof. Lalnilawma chuan May 26, Thawhlehni khan LAD confe-rence hall-ah Panchayat Advancement Index (PAI) 2.0 Report Card a tlangzarh.

Prof. Lalnilawma chuan, Local Administration department (LAD) hmalakna thar PAI 2.0 chu a ṭangkai thu a sawi a, "PAI indicator hrang hrangte hi khawtlang hmasawnna atan an pawimawh hle dawn. Village council-te chu khawtlang hmasawnna tura kaihruaitu pawimawh tak an nih angin, PAI kaltlanga data la khawmtu mawhphurhna lian tak an nei a ni," a ti.

Localisation of Sustainable Develop-ment Goals (LSDGs) thupui pakuate chu United Nations (UN)-in a duan leh sorkar laipui pawhin a kalpui mek Sustainable Development Goals (SDGs) nena kal kawp tlat a nih thu sawiin Minister chuan, thupui pakuate chu bel taka hriat chian a ṭul thu a sawi.

RDA Minister chuan, Mizoram hmun hrang hrangah LSDGs thupui pakua hnuaia Grade D (beginner) awm miah loa Mizoram a awm thei chu chhuan tlak a nih thu a sawi a, "Viksit Bharat 2047 thlen nan LSDGs theme hre reng chunga grassroot level aṭanga hmasawn a ṭul a, PAI indicator-te en chungin hmasawnna a thlen thei a ni," a ti.

Prof. Lalnilawma chuan, VC-te hnenah thuneihna leh chakna pek an ṭhat thu sawiin, "Capacity building leh training ṭha an mamawh nasa a, VC enkawltu department-te'n theihtawp kan chhuah a, kan ṭanho zel a ṭul," a ti a; PAI 2.0 Report Card chu hmasawnna tura inen lêtna darthlalang bera hmang turin sorkar official leh khawtlang hruaitute a chah.