Councillor hluite'n inkhawmpui an hmang

Councillor lo ni tawhte intêl khawmna, Former Councillors’ Association of Mizoram Municipalities (FOCAM) chuan nimin khan Aijal Club-ah Annual General Body Meeting vawi 6-na an hmang a, minister C Lalsawivunga'n hmanpui.

C Lalsawivunga chuan, ram ṭhatna tur ngaihtuah leh hmasawnna tura ke pên chu mi tin mawhphurhna a nih thu a sawi a, "Inthliarna awm loa thawhho a ṭul a, hemi kawngah hian FOCAM hi hmasawnna atana pawl ṭangkai tak leh inlungrual tak a ni. Mipuite’n hmasawnna an duh a, municipality leh corporator-te mawhphurhna hi mipuiin an hre chiang chho mek," a ti a; corporator-te chu Aizawl hmasawnna atana pawimawh an nih avangin corporator-te a ṭul huna puitu ni turin FOCAM member-te a chah.

Aizawl chu ruahmanna mumal awm loa din a nih thu sawiin Minister chuan, "Hmasawnna tur leh siamṭhat ngai tam tak awm. Thlen chin aṭanga hmasawnna kawng zawhin, India mai ni lo, ram dang mite pawhin ram nuam leh chenna tlak an tih ni tura ṭan lak zel a ṭul," a ti.

C Lalsawivunga chuan, khawpuia mi rethei leh chan chhe zawkte dinhmun chu veiawm a tih thu sawiin, "Mi chan chhe zawkte chawikanna hna hi ram hruaitu kutah dah mai loin, mahni theihna kawngah ṭheuh hma kan lak a pawimawh, " a ti a; mi tin tana hmasawnna thlen thei tura ram hruaitute thawhpui zel turin AMC councillor/corporator hluite a sáwm.

FOCAM Annual General Body Meeting-ah hian rorel inkhawm neih a ni a; an pawl hming (Former Councillors’ Association of Mizoram Municipalities) tih chu Former Corporators' Association of Aizawl Municipal Corporation tiin an thlak a ni.