Hmeichhe nemngheh chungchangah PCI-in inrawnkhawmna an buatsaih

Presbyterian Church of India (PCI) ruahman angin nimin khan Youth Recreation Centre, Aizawlah minister/pastor atana hmeichhia nemngheh chungchangah inrâwnkhawmna neih a ni.

Inrawnkhawmna hi hun hnihah ṭhen a ni a; hun khatna chu PCI Sub-Committee on Women Ordination chairman Rev. DC Hai-a'n a kaihruai a, Mizoram Synod moderator Rev. John Raldosanga'n inlawmna thu a sawi. 'Hmeichhe nemngheh: Bible thuchah leh Pathian thu chhui zauna aṭanga thlirna' tih chu Rev. Dr Vanlalnghaka Ralte-in a chhiar a, sawihona a ni.

Chawhnu lama hun hnihna chu PCI Sub-Committee on Women Ordination member Rev. GS Lyttan-in a kaihruai a; 'Hmeichhe nemngheh: Hnam zia leh kohhran aṭanga thlirna' tih paper chu Sub-Committee member Rev. Dr K Lalrinkima, ATC principal ni bawkin a chhiar a, sawihona zui a ni.

PCI huaihawt inràwnkhawmna hi PCI General Assembly-a hmeichhe nemngheh chungchang thurel bawhzuina a ni a; PCI chuan women ordination chungchangah Synod tinte inrawnkhawmna nei turin a ti. Inrawnkhawmnaa ngaihdante chu PCI General Assembly-ah ngaihtuah leh a ni ang.

Inrawnkhawmna atan hian Mizoram Synod chu zone thumah ṭhen a ni a; May 26, 2026 khan Kolasib Venglaiah inrawnkhawmna buatsaih a ni tawh a, May 29, 2026 hian Serchhip Kawnpuiah neih leh tura ruahman a ni.