Mamita sorkar hmunhmate endik

Persons with Disabili-ties (PwD) commissioner Vanlaldiki Sailo chuan nimin khan Mamita sorkar hmunhmate tlawhin, sorkar laipui duh dan angin rualbanlote (vohbikte) tana awlsam zawka office/building luh leh chhuah theihna siam dan a endik.

Sorkar laipui chuan India rama rualbanlote hamṭhatna tura a duan, Accessible India Campaign hnuaiah access audit neih a ni a; khawi hmun pawh rualbanlote harsa loa an thlen theih nan - wheelchair hmang te, mitdelte leh a dangte tan mipui punkhawmna vantlang hmun hrang hrang - biak-in, sorkar pisa, zirna-in leh a dangte chu siam rem ngei ngei tur tiin thupek siam a ni.

Sorkar laipui thupek bawhzuiin India ram pumah audit team leh rualbanlo aiawhte'n sorkar leh vantlang hmunhmate an endik ṭhin a; Mizoramah pawh February 24, 2025 aṭangin access audit tih ṭan a ni. Mamit chhiar telin PwD Commissioner hian district 10-ah access audit neiin hmunhma a endik tawh a ni.