Rodingi'n Tourism Director aṭanga bànna a thehlut; CM-in a pawm

Tourism director mawhphurhna la tura Mizoram sorkarin a ruat R Lalrodingi chuan MZP aṭanga dodalna a awm avang leh ni thum chhung Tourism department-a thawkte hna thawk thei loa an awm tawh avangin nimin khan Chief Minister hnenah Tourism Director aṭanga bànna a thehlut.

R Lalrodingi chuan, "Hna tiṭhuanawptu leh i sorkar pawhin duhsak uchuak ni anga lang thei tura keimah ka lo awm reng hi dik theiin ka hre lo," tiin CM hnena lehkha a thehluhah a ziak. Sorkar hnaa a service tawp lamah Tourism director atana dah a nih chu a lawm thu a tarlang a; Tourism Director post chu Tourism department officer-te tan hum zel turin CM a ngen nghal bawk.

Tourism director aṭanga bànna R Lalrodingi'n a thehluh hi chief minister Lalduhoma chuan nimin khan a pawm nghal a ni.

Tourism director mawhphurhna chelh tura R Lalrodingi, sorkar hna aṭanga pension tawh chu May 22, 2026-a ruat a nih avang hian MZP chuan May 25-27, 2026 chhung khan Tourism Directorate-a thawkte pisa kai tur an dang a; nimin erawh chu pisa chawlh ni a nih avangin an che chhuak lo.

MZP hian Tourism director mawhphurhna la tura R Lalrodingi ruatna chu sût (cancel) turin sorkar an phût a, R Lalrodingi chu báng turin an phût tel bawk.

MZP chuan nimin khan thuchhuah siamin, "Pensioner rawih nawn (re-employment) emaw, service extension hian ṭhalai tam tak hna zawng mekte a dâl ṭhin avangin, hetiang system hi ṭha kan ti ngai dawn lo a, kan dodal zel dawn a ni," an ti.