AED PYD-te'n Chite lui an tifai

UPC (NEI) Aizawl East District PYD Environment Protection Committee hmalaknain nimin khan Aizawla pastor bial hrang hranga PYD-te'n Chite lui an tifai a, Aizawl deputy mayor R Lalawmpuii'n a hmanpui.

Hnatlang hi AED PYD vice president Dr R Vanlalpeka'n a hawng a; Aizawla pastor bial hrang hrang aṭangin PYD member 200 vel an thawk chhuak. Bethlehem Vengthlang kâi Chite lui an tifai a, bawlhhlawh ip (garbage bag) 270 vel an chhar khawm chu AMC-in bawlhhlawh paih motor an hmantir hmangin a paihna turah paih a ni.

R Lalawmpuii chuan, smart city siam turin AMC-in theihtawp a chhuah dawn tih sawiin, "A hmun loa bawlhhlawh paih mai mai hi pawisa chawitirna dan kan nei. Kan chenna in bulhnai kawra bawlhhlawh paih leh ek-in sah duh maite kan la awm ṭhin a, ruah a sûr nasat laiin kawr bulhnaia awmte tan tukverh pawh hawn ngam loh khawpin a rimchhe ṭhin," a ti a; faina kawnga PYD hmalakna chu chhuanawm a tih thu sawiin, chhunzawm zel turin a chah.