MPF-in kumina hmalakna tur sawiho

Mizoram People Forum (MPF) Govern-ing Board chu nimin khan Synod Committee Room-ah an ṭhukhawm a, Aizawl Municipal Corporation (AMC) inthlana MPF hma-laknate an thlir lêt bakah, kumina MPF hmalak dan tur ruahmannate an sawiho.

MPF Governing Board ṭhutkhawmah hian member eng emaw zat an tel a; president Rev. John Raldosanga'n a kaihruai a, general secretary Rev. Lalramliana Pachuau-in MPF hmalakna tlangpui a sawi.

April 21, 2026-a AMC inthlanpuia MPF hmalakna leh chêt vel dante thlir let a ni a; inthlanna thianghlim a awm theihna tura MPC local forum leh constituency forum ten an huam chhung hneh taka an vil chu lawmawm an tih thu an sawi. Hmun ṭhenkhatah MPF leh political party-te Thawhhona Thuthlung hriat chian tâwk lohna a la awm nia a lan thu an sawi bawk.

Kumin 2026-a MPF hmalak dan tur ruahmannate sawiho a ni a; ṭhalai leh zirlaite hnena sorkar ṭha (good governance) pawimawhna zirtir dan tur te, media hman ṭangkai dan turte leh kawng hrang hranga hmalak dan turte an ngaihtuah a ni.