Id-Ul Zuha-ah Mosolman-te an ṭawngṭai

Nimin kha Muslim ni pawimawh, Id-Ul Zuha (Bakrid) a ni a, Mizorama Mosolman-te pawhin an hmang a, Aizawlah chuan Aizawl Mosque Committee huaihawtin zing dar 8 khan Lammualah an ṭawngṭai.

Aizawl Mosque Committee & Muslim Welfare Society Mizoram general secretary Md. Mamon Majumdar chuan, Id pualin Mizoram mipui duhsakna a hlan a; Mizoram sorkar, YMA leh mipui nen thawhhona ṭha an nei ṭhin chu lawmawm an tih thu leh thawhhona ṭha neih zel an duh thu a sawi.

Md. Mamon Majumdar chuan, dan zawm chu khua leh tui ṭhate tih tur a nih avangin Inner Line Permit chungchanga dante ṭha taka zâwm tur leh, ram neitu mipui nen inpawh tak leh hlim taka awmho zel turin Mizorama Muslim awmte a chah a; Mizoram leilung fate'n hna thawh tur an pek vanga chhungkaw châwma ei hmu an nih thu sawiin, kutdawh leh harsatna siam zawnga khawsak lo turin a fuih bawk.

Id-Ul-Zahir hmannaah hian Mosolman-te Mizoram, India ram leh khawvelah remna leh muanna a awm theih nan te, hnam hrang hrang inkarah inunauna ṭha a awm theih nante an ṭawngṭai a ni.