Housing & Urban Minister a rawn zin

Sorkar laipui Housing & Urban Affairs enkawlut minister of state Tokhan Sahu chu Mizoramah a rawn zin a, nimin khan Champhai tlawhin, Circuit House-ah sorkar hotute leh khawtlang hruaitute nen hun a hmang.

Tokhan Sahu chuan, Champhai chu hmun mawi tak a nih thu a sawi a; India ram chu hnam hrang hrang chenna a nih avangin inpumkhatna a pawimawh thu sawiin, "India ramah hian hman aṭang tawhin inpumkhatna pawimawhzia kan sawi tawh a, kan hnam leh nihna hi hlut a, hre chiang chunga India ram mi dangte nena inpumkhatna vawn nun a pawimawh," a ti.

NDA sorkarin hmarchhak bial a ngai pawimawh hle nia sawiin Tokhan Sahu chuan, "Hmalakna hrang hrang a awm a, hna pawh ṭhahnem tak thawh tawh a ni. One India siam hi kan tum a ni a," a ti a; One India siam tumnaa ṭan la turin kalkhawmte a sáwm.

Tokhan Sahu hian Pradhan Mantri Awas Yojana - Urban leh Deendayal Antyo-daya Yojana - National Urban Livelihood Mission hnuaia hamṭhatna dawngtute nen inkawmna hun an hmang a; PMAY-U leh DAY-NULM hnuaia hmalakna kalpuitute'n Champhai Circuit House tualah an thil siamte an pho chhuak bawk.