Zebra crossing-ah dan lekkawh tum

Traffic SP C Vanlalvena chuan thuchhuah siamin, zebra crossing-ah lirthei din phal a nih loh thu a tarlang a, "June 1, 2026 aṭangin Aizawl Traffic Police-te'n zebra crossing kaihhnawiha dan bawhchhiate lakah na zawkin hma a la dawn," a ti.

C Vanlalvena chuan, Aizawlah kea kalte him zawk nan leh traffic enkawlna a felfai theih zawk nan zebra crossing eng emaw zat siam a nih thu a tarlang a, "June 1, 2026 aṭangin Traffic Police-te chuan zebra crossing kaihhnawiha dan bawhchhiate lakah na zawkin hma a la dawn. Dan bawhchhiate chu The Motor Vehicles (Amendment) Act, 2019 Section 177 & 184 angin hrem theih an ni," a ti a; kea kalte pawh kawng kán dawna fimkhur taka kawngpui en chiang hmasa turin a chah.

Traffic SP chuan, lirthei khalhtute chu zebra crossing an thlen dawnah fimkhur taka tlan muan a, kawng kán turte tana a hlauhawm leh hlauhawm loh en lâwk ṭhin turin a chah a; zebra crossing-a lirthei din phal loh chuan traffic jam laia din pawh huam thu a tarlang.