Online Tax Portal Version 2.0 hawn a ni

Online hmanga chhiah pekna tur, Online Tax Portal Version 2.0 'landtax.mizoram.gov.in' chu nimin khan Land Revenue & Settlement (LRS) minister B Lalchhanzova'n LRS Directorate conference room-ah a hawng.

Online Tax Portal Version 2.0 hi LRS department leh Information and Communication Technology (ICT) department ten an siam a ni a; leiman (land tax) leh Zoram Chhiah pekna atana record pawimawh ration card number leh phone number link thar emaw, link ṭhat ngaite tan pisaa kal ngai loin, portal hmangin thehluh theih a ni tawh dawn.

Leiman pe turte tan family ID hmanga pek a ngai tawh dawn a, mahni family ID hre lo tan portal-ah hian a zawnna dah a ni. Lawngtlai leh Siaha district tih loh chu district zawngah mite chuan online portal hmangin chhiah an pe thei tawh dawn a ni.

Tax Portal Version 2.0 hmang hian SMS hmangin chhiah pek hun leh chhiah pe lote ṭhînna tur duan a ni a, Bharat Bill Payment System (BBPS) service awmna mobile application - GPay, PhonePe, BHIM, Amazon Pay leh a dangte hmangin service list aṭangin family ID emaw, ration card number emaw hmangin chhiah a pek theih tawh dawn a ni.

Revenue Minister chuan, a hmuna chhiah khawn ngai loa mipuite’n awlsam zawka chhiah an pe thei tawh tur chu lawmawm a tih thu a sawi a, "Khawvelin changkanna kawngah ke a pên rualin Mizo mipuite'n kan pên ve zel thei a ni. Ram hmasawn leh hnam zahawm ni thei turin mipuite'n chhiah kan pek ṭhat a ngai," a ti.

B Lalchhanzova chuan, Mizote chu mahni kea ding thei ram ni turin LRS department-in hma a la ṭan tih sawiin, "Hetiang technology lama hmasawnna hian India ram puma hmasawnna tehnaah pawh dinhmun ṭha zawkah Mizoram chu a chawikang a ni," a ti a; state dangte tih dan en ringawt bik lo a, state dangte’n Mizoram an entawn theih nan hmalak zel a nih thu a sawi.

ICT-a informatics officer C Lalrinfela sawi danin, Online Tax Portal Version 2.0 hi Version 1.0 nena a danglamna lian ber chu, Annual Performa hmanga siam vek a ni tawh a, chu chu kum bithliaha mipuite tan chhiah pek tur zat felfai taka duanna a ni.

ONLINE TAX PORTAL VERSION 2.0

☑ Leiman leh Zoram Chhiah te chu Annual Proforma behchhan a nih tak avangin report leh estimate felfai zawk siam kawngah leh chhiah pe ṭha leh ṭha lo chhinchiah kawngah thawktute a tichhak dawn.

☑ Rate leh chhiah chawi tur zat thlak (revised) a nih pawhin harsatna a awm tawh lo.

☑ Surveyor leh Manual Fee collection ti ṭhin tan payment record felfai taka chhinchhiahna dah a ni.

☑ Chhiah target leh Revenue statistics-te hmuh mai theihna dah a ni.

☑ Periodic patta leh house pass (validity neite) automatic-in system-in zar dar 12 pelh chiahah a block zel tawh dawn.

☑ Leiman leh Zoram Chhiah master record-ah hian tihdanglam awm apiang system-in a chhinchiah zel dawn.