Online-a taxi koh theihna 'Mizotaxi'

Online hmanga taxi koh theihna tur, 'Mizotaxi' application chu tlangzarh a ni a, July 1, 2026-ah hman ṭan a ni dawn. Aizawla four wheeler taxi, two wheeler taxi leh auto rickshaw te chu June thla chhungin Transport Complex-ah inziak lut vek tura hriattir an ni.

State Transport Authority (STA) Secretary chuan nimin khan thuchhuah siamin, Mizorama mihring phur chi lirtheiah sorkar pawmpui chuan man (approved rate) dik tak mipuiin an pek theihna tur leh online hmanga taxi koh theihna tura duan 'Mizotaxi' mobile app hman theiha peih a nih thu a tarlang a, "Sorkar duh dan angin Aizawl khawpuiah bul ṭan tur a ni a, a tahtawlin district dangah pawh kalpui zel tum a ni," a ti.

Mizotaxi app hi Mizoram sorkar leh Digiride Technology, NIT, Mizoram te duan a ni a, Playstore leh Appstore aṭanga lak (download) theih a ni. July 1, 2026-ah a taka hman ṭan a ni ang.

Aizawla four wheeler taxi, two wheeler taxi leh auto rickshaw te chu June 2026 chhungin Chaltlanga Transport Complex-ah inziak lut vek tura ngen leh hriattir an ni a; June 2026 chhunga inziak lutte tan registration fee kum khatah Rs 600 (Rs 50/month) niin, June thla hnu lama inziak lutte tan Rs 1,000 a ni tawh ang.