Pa deuh hrêk hrâwkin ruihhlo do ang u - CYMA President

Central YMA president R Lalngheta chuan, khaw-tlang a him theihna tura hmalakna leh ruihhlo donaah nasa zawka ṭan la a, pa deuh hrêk hrâwka ruihhlo do turin Aizawla YMA branch hruaitute a chah.

R Lalngheta hian May 28, Ningani zana CYMA Hall-a Aizawl City Inter Branch YMA Cleanliness Competition hawnnaah thu sawiin, tunlaiin Aizawlah tleirawl insual leh insual rawn hriat tur a tam thu a sawi a, "Hei hi an sual vang hrim hrim ni loin, tleirawl ât vangte a ni thei a, thu ṭha hrilh an mamawh. YMA branch tin hian kan rawltharte hi thu ṭaa hrilhna hun i siam ila, ṭan i la thar ang u," a ti.

CYMA President chuan, ruihhlo donaah ṭanrual a ngaih thu sawiin, "Branch ṭang tak tak an awm a, mahse, kan ṭanrualna a la rual tâwk lo. La che tâwk lo branch awm theih a ni a, kan zavaia kan ṭan a ngai," a ti a; a tak taka thawk ngam hruaitu ni turin YMA hruaitu kal khawmte a sâwm.

YMA-in ruihhlo an donaah invaunate pawh a awm theih thu sawiin R Lalngheta chuan, "Invauna a awm a nih pawhin i tîm phah lo ang u. Hnungtawlh hauh lo a, hma lan pan turin ṭan la ila, Mizo, hnam dang, ram dang mi, a tuate mah dîm lo ila, ṭi dei dui loin, pa deuh hrêk hrâwkin i do ang u. Kan ram leh hnam chhanna atan chuan a ṭul chuan a tawrh pawh kan tuar ve mai tur a ni," a ti.