Fainaa YMA branch inelna ṭan a ni

Urban Development and Poverty Alleviation department, Central YMA, Aizawl Smart City leh Aizawl Municipal Corporation te chuan kuminah Aizawla YMA branch-te tan veng fai inelna an buatsaih leh dawn a; inelna atana tehfung inhrilhfiahna hun May 28, Ningani zan khan CYMA Hall-ah hman a ni.

Inkhawm hi CYMA treasurer H Duhkima'n a kaihruai a, CYMA president R Lalngheta leh Coordination Committee on Comprehensive Plan for Municipal Waste Manage-ment in Aizawl member secretary V Lalruat-liana ten thu an sawi. Endiktute zinga mi Dr Gospel Lal-lawmzuali'n endikna tehfungte a sawifiah bawk.

CYMA-in YMA branch 111 enkawlin, chungte chu city branch tih an ni a, AMC huam chhunga mite bakah, Aizawl bul hnaia khua/veng (branch) eng emaw zat an tel. Inelnaah hian endiktu pathum - Vanglaini joint editor leh MJA general secretary K Zothanpara, Save the Riparians president Romalsawma leh environmentalist Dr Gospel Lallawmzuali te an awm a; branch tinte ṭum hnih an endik hnuah Chapchar Kût 2027-ah lawmman sem a ni ang.

Aizawla YMA branch anga veng fai inelnaah hian pakhatnain Rs 3,00,000, pahnihnain Rs 2,00,000 leh pathumnain Rs 1,00,000 an dawng dawn a ni.

CYMA president R Lalngheta chuan, YMA Rorel Inkhawm vawi 4-nain a rel angin, faina leh thianghlimna kawnga inzirtirna lamah hmalak chhoh a nih thu a sawi a, "Fainaah hma kan sawn a, mahse, motor aṭanga bawlhhlawh paih chhuah mai maite a la tam. Fainaah Aizawl hian thingtlang lam kan pha lo a, kan ṭan a ngai. Mipuiah fai duhna thinlung kan tuh a ngai a, fai turin ṭan i la tlang ang u," a ti. Fainaa veng inelna chu ngai pawimawh a, theihtawp chhuah turin YMA branch-te a chah.

UDPA department, CYMA, Aizawl Smart City leh AMC te chuan nikum khan YMA branch-te veng fai inelna an lo buatsaih tawh a; pakhatna Chawnpui Branch, pahnihna Laipuitlang Branch leh, pathumna Electric Veng Branch leh Republic Vengthlang Branch te an ni.