World No Tobacco Day hman a ni

Nimin khan Mizorama hmun ṭhenkhatah World No Tobacco Day pualin hun hman a ni a; World Health Organisation-in kumina thupui atana a thlan chu 'Unmasking the appeal – countering nicotine and tobacco addiction' tih a ni.

World No Tobacco Day pual hian Aizawlah chuan Hospital and Medical Education auditorium-ah hun hman a ni a, National Health Mission (NHM) mission director Dr R Lalchhuanawma'n a kaihruai. National Tobacco Control Programme (NTCP) state consultant R Lalremruata'n thupui a sawi a; Indian Society on Tobacco and Health - Mizoram Chapter president VL Vela'n thu a sawi bawk.

Dr R Lalchhuanawma chuan, Health department-a thawkte chu mipui hriselna atana thawktu an nih avangin vaihlo zûk leh hmuamah fihlim turin a chah a, "Mipui hriselna tura thawkte vaihlo lakah fihlim vek thei ila, home visit kan neih ṭhinnaahte zirtirna pe uar zel ila, generation thar - tobacco free kan neih theih nan ṭan lak a pawimawh," a ti.

Thupui sawitu R Lalremruata chuan, Health department-a thawk te, zirtirtu te, dan kengkawhtute leh tlawmngai pawl pawl hrang hrangah zûk leh hmuam ṭhat lohzia inzirtirna vawi 107 an buatsaih tawh thu leh, zirna-inah awareness programme vawi 204 an neih tawh thu a sawi a; meizûk phal lohna hmuna zu mi 7,580 man an nih tawh thu a sawi bawk.

World No Tobacco Day hi May 31 a ni a, kuminah Pathianni a nih avangin nimin khan hman a ni. Inkhawmah hian e-cigarette/vapes te chu Prohibition of Electronic Cigarette Act, 2019 hmangin India ram pumah lak luh, sem darh leh zawrh khap a nih thu tarlan a ni.

No Tobacco Day hi Khawzawl Higher Secondary School-ah pawh hman a ni a, zirlai ṭhahnem tak an tel. District programme manager Laldinsanga'n a kaihruai a, Khawzawl SP F Lalbiakzauva khuallian a ni.

F Lalbiakzauva chuan, zûk leh hmuamin hriselnaah nghawng ṭha lo tak a neih thu sawiin, "Kumina thupui ‘Unmasking the appeal – countering tobacco and nicotine addiction’ hian vaihlo leh a kaihnawih îtawm taka lang chu a hlauhawmzia leh na tak tuar chunga thihna a thlen theih hai lang a tum a ni," a ti a; zûk leh hmuam chu ruihhlo hlauhawm zawk tihna kailâwn a nih avangin vaihlo laka fihlim turin zirlaite a chah.