Union HUA MoS-in Champhai a fang

Sorkar laipuia Housing & Urban Affairs minister of state Tokhan Sahu chuan nimin khan Champhaia hmun ṭhenkhat - Champhai Zotea PMAY-U ṭanpuina hmanga in sak te, Champhai District Hospital, Kahrawt Anganwadi leh Kei-lungliah tuikhuah te a tlawh.

Tokhan Sahu hian Pradhan Mantri Awas Yojana - Urban (PMAY-U) ṭanpuina hmanga Zotea in sakte a en a; ṭanpuina sum an dawn hmanga in ṭha tak an sa chu lawmawm a tih thu a sawi bakah, in satute pawhin an lawm thu an lo hrilh.

Union MoS hian Champhai District Hospital tlawhin, medical superintendent Dr Zatluanga leh thawktu dangte'n an lo dawngsawng a, damdawi-in chhung hmun hrang hrang a fang. Kahrawt Anganwadi tlawh lehin, thawktu te, naupangte leh an nu leh pate'n an lo dawngsawng a, hun an hmangho a ni.

Tokhan Sahu hian hmei-chhia, pasal ṭhen vanga awmna nei lote awmna leh hleilenna tuarte enkawlna Shakti Sadan, Champhai Vengthlang a tlawh a; ni tina hun an hman dan te, hna an thawh dan leh Shakti Sadan an kalpui dante a zawt. Thawktute chuan, Shakti Sadan-a awmte chu hmeichhia, harsatna khirh tak tâwk an nih ṭhin thu leh kum thum chhung an awm theih thu te an lo hrilh.

Union Minister hian Kei-lungliah tuikhuah a tlawh a, PHE department hotute'n hma an lak dante leh an hmachhawpte an hrilhfiah a ni.

MoS Tokhan Sahu hian May 28, Ningani khan AMRUT 2.0 hnuaia Mualkawia Solid Waste Ma-nagement Centre a tlawh bawk.