CM hoin ZMCH Governing Body an ṭhu

Zoram Medical College & Hospital Governing Body chu nimin khan CMO conference hall-ah an ṭhukhawm. Ṭhutkhawm hi Governing Body chairman Lalduhoma, chief minister-in a kaihruai a, Health minister Lalrinpuii, Education minister Dr Vanlalthlana, bialtu MLA Baryl Vanneihsangi leh member dangte an tel.

ZMCH tihchangtlunna tur ruahmanna, MPLAN-a dah luh tawhte thlirho a ni a; project-tea ngaih pawimawh hmasak dan indawt (priority list) an siam. Project-te chu a ruala thawh nghal vek theih a nih loh thulhah thawh hmasak dan tur indawt siam ṭhin a ni.

Medical college-a department awm ngei ngei tura National Medical Commission-in a tihah Department of Physical Medicine & Rehabilitation-ah doctor pakhat chauh a awm mek a; doctor awm chhun hian clinical leh faculty mawhphurhna a lak kawp avangin, a rang lama siam fel ni se, an ti.

CSR fund hmuh aṭanga Critical Care Block sak mek chungchangah, sak zawh a nih huna ṭangkai taka hman dan tur sawiho a ni bawk.

Ṭhutkhawma tarlan danin, kum hnih kal ta chhungin ZMCH-ah hian cabin thar 30 leh ICU thar 13 siam a ni a; tun dinhmunah khum 517 awmin, Mizorama damdawi-in lian ber a ni. October 2024-ah post graduate zirna seat 10 hawn a ni a, tunah mi pakuain PG an zir mek. ZMCH aṭang hian MBBS batch thumna an chhuak tawh a ni.