MUP Lengkhawm Zai Intihsiak buatsaih

Art & Culture department leh MUP General Headquarters chuan nimin khan Vanapa hall-ah MUP Lengkhawm Zai Intihsiak an buatsaih a, Mission Vengthlang Unit pakhatna an ni.

Lengkhawm Zai Intihsiakah hian Aizawla MUP area level-a intihsiaknaa pakhatna ṭheuh, unit 14 an tel a; pakhatna Mission Vengthlang, pahnihna Bungkawn leh pathumna Armed Veng an ni. Khuangpu ṭha ber - khuangpuiah H Lalmuana, Laipuitlang, khuangteah Vanlalfala Khiangte, Bungkawn an ni a; hla hril thiam ber Lalrinsiami Colney, Mission Vengthlang niin, member tam ber Zemabawk an ni.

Chawhnuah result puan leh lawmman semna inkhawm buatsaih niin, Art & Culture director Carol VLMS Dawngkimi'n a kaihruai a, Art & Culture minister C Lalsawivunga khuallian a ni. Minister chuan, MUP member-te chu khawtlang leh ram tana ro hlu an ni tih hre reng tur leh, Zo nun ze mawi - aia upa zah thiam kawngah an tu leh fate kaihruaitu ni turin a sáwm.