New Age Tech Skills Centre hawng

School Education minister Dr Vanlal-thlana chuan nimin khan Comprehensive Model School, Model Vengah India hmarchhak state-a 'New Age Tech Skills Centre' hmasa ber a hawng.

New Age Tech Skills Centre hi Bharat Forge Ltd. corporate social responsibility sum hmanga din a ni a, project technical partner chu SimuSoft Technologies a ni. Anni hian Mizoram School Education department nen ṭanghoin hma an la a; zirlaite chuan artificial intelligence (AI), robotics, Internet of Things (IoT), 3D printing, CAD, CNC simulation leh drone technology ang chi technology tharte an zir dawn a ni.

New Age Tech Skills Centre hawnnaah hian School Education secretary David Lalthantluanga leh director Angela Zothanpuii bakah, technical institution hrang hrang aiawhte an tel a; AI, robotics, IoT leh simulation technology te a taka entir nghal a ni bawk.