Mizo zinga Mathematics-a PhD hmasa ber Dr LN Tluanga a thi

Mathematics-a Mizo zinga doctor of philosophy hmu hmasa ber Dr LN Tluanga (93) h/o Biakveli, Mission Veng chu nimin tlai dar 3 khan a thi. Vawiin chawhma dar 11-ah Mission Veng Presbyterian Kohhran Sunday School Hall-ah thlahna inkhawm neih a ni ang a, chawhnu dar 1-ah biak-inah vui a ni ang.

Dr LN Tluanga hi kum 1933 khan Bukpui khuaah a piang a; Scottish Church College, Kolkata aṭangin kum 1955-ah B.Sc (Mathematics) a zo. MSc a zawh leh hnuah, kum 1974 khan Gauhati University aṭangin PhD a zo a, Mizo zinga Mathematics-a PhD hmasa ber a ni.

Mizoram sorkarah Education department Director hmasa ber a ni a, Science tihhmasawnna turin nasa takin a thawk a, a hoin kum 1979 khan Mizoram Science Society (MSS) din a ni. MSS hian May 13, 2026 khan Mizoram Science Award hmasa ber an hlan.

Education Director a nih laiin, a hna kalsanin kum 1982 khan Kiribati-ah missionary-in an nupain an kal a; Mizorama an rawn haw leh hnuah pawh zirna leh Pathian rawngbawlna lamah nasa takin a inhmang zui. Central KṬP-ah general secretary a lo in tawh a; kum 1980 khan kohhran upa atan nemngheh a ni.

Mizo hla sak lâr tak 'Pathian hmangaihna ropuizia' tih letlingtu a ni a; a chanchin a ziahna lehkhabu (autobiography) 'Kawlkil thleng pawhin' tih leh 'Arkhawthim dai' tihte a lo tichhuak tawh a, 'Kristian hlimna thuruk' tih lehkhabu a tichhuak tawh bawk.