Agriculture Minister-in Central hotute hmaah Mizoram mamawh hrang hrang a sawi

Agriculture & Farmers Welfare minister PC Vanlalruata chuan tun hnai khan New Delhi-a National Conference on Agriculture for Kharif Campaign-ah a tel a; Mizoramin fûr leh ṭhál laia zawh theih feh kawng a mamawh thu leh, district thar pathumah Krishi Vigyan Kendra (KVK) din belh a ṭul thu a sawi.

PC Vanlalruata chuan, Mizoram, tlang ram angah chuan fûr leh ṭhála zawh theih feh kawng (all-weather farm road) neih a pawimawh thu a sawi a, "India hmarchhakah ruahtui a tam avangin kut hnathawktute’n an huan lo ram panna tur kawng ṭha an mamawh a, kalkawng ṭha zawk an neih theih nan sorkar laipui puihna kan mamawh," a ti.

Mizorama district thar pathum - Saitual, Khawzawl leh Hnahthial district-ah KVK din belh a ṭul thu sawiin Minister chuan, "KVK thar dinna tur proposal thehluh a ni tawh a, approval a chhuah vat theih nan central sorkar ṭanpuina ka ngen a ni. Price Support Scheme hnuaia behliang, chhawchhi leh nihawite lei ṭan a ni dawn a, sorkar laipui hotute hnenah lawmthu ka sawi a ni," a ti a; ruahtui khawlna tur tuizem lian zawk leh ṭha zawk Mizoramin a mamawh thu a sawi.

PC Vanlalruata chuan, Mizoram chu India ram hmun dang ang loin tlang ram, leilung danglam a nih avangin central scheme-te chu Mizoram leilung mila tihdanglam theih ni se a duh thu a sawi a; loneitute’n hma an sawn zel theih nan sorkar laipui chu theihtawp chhuaha thawhpui a inhuam thu a sawi bawk.

Inkhawmpuiah hian sorkar laipuia Agriculture Minister leh official te, state hrang hrang Agriculture kaihhnawih minister-te leh official-te an tel a; fûr thlai chin dan tur (kharif season) leh a kaihhnawih hrang hrangte sawiho a ni. Mizoram Agriculture & Farmers’ Welfare department aṭangin Minister bakah, additional secretary Lalnunhlua, additional director B Ramnunsanga leh deputy director Simon Rosangliana te an tel.