Larsap leh scho' dawngtu zirlaite inkâwm; Zirlaite'n scho-a harsatna awmte an hrilh

Governor Gen. Dr Vijay Kumar Singh chuan May 29, 2026 khan Lok Bhavan-ah Post Matric Scheduled Tribe Scholarship hamṭhatna dawngtu zirlaite a kâwm. Zirlaite hian Larsap hnenah hian a hun taka tribal scholarship an dawn ṭhin loh vanga harsatna an tawh ṭhinte an thlen.

Larsap chuan, Post Matric Tribal Scholarship chu sum leh paia inpuihna mai ni loin, mawhphurhna keng tel a nih thu sawiin, sorkar laipuiin tribal-te hmasawn nan theihtawp a chhuah a, tribal scholarship leh scheme dangte mi dangte hrilhhriaa thehdarhtu ambassador nih tum ṭheuh turin a chah a; tribal-te zirna chawisan nana din Eklavya Model Residential School, Jawahar Navodaya Vidyalaya leh Kendriya Vidyalaya-te chhawr ṭangkai a ṭul thu a sawi.

Zirlaite chu ram innghahna an nih thu leh Digital India hmalakna ngai pawimawha lehkha phek hman titlem turin Governor chuan zirlaite a chah a, "Scholarship hian ken tel a nei a, lehkha zir taimak, entawn tlak taka nun leh exam tura ṭha taka inpuahchah te, chhungkua, state leh ram dah pawimawhte bakah, mi dang puih duhna putte a keng tel a ni," a ti.

Zirlaite chuan, Post Matric Scheduled Tribe Scholarship siamtu sorkar chungah an lawm thu sawiin, harsatna an neihte an thlen. A hun taka scholarship lut lo ṭhin chuan admission fee, zirlaibu leina leh ṭul dangah harsatna a thlen thu te, zirna senso sang zelah scholarship pung ve se an duh thu te, online application awlsam leh rang zawk bakah Aadhaar leh bank account thlun zawmnaa harsatna awm ṭhinte an tarlang.

Bank branch tinah scholarship bik buaipuina tur helpdesk dah an duh thu te, tribal zirlai ST Scholarship dawng theite hmaih an awm loh nan awareness campaign nasa zawka neih ṭha an tih thu te, form submit laia senso awmte tihbo emaw, tihtlem emaw ni se an duh thute an thlen bawk.

Inkawmhona hi Janjatiya Garima Utsav 2026 hnuaia 'Birsa Lives in New Bharat Week' kaltlanga buatsaih a ni a; Mizoram Scholarship Board secretary Dr C Laldawngliana leh under secretary Joseph L Hauhnar te pawh an tel. Inkawm zawhah Larsap thurawn angin zirlaite chuan an ngaimawh zawngte ziakin an thehlut a ni.