HIV/AIDS vanga thite hriatrengna hun hmang

Positive Women Network of Mizoram (PWNM) chuan May 29, 2026 khan Mission Vengthlang Presbyterian Kohhran Golden Jubilee Hall-ah HIV/AIDS vanga thite hriatrengna, Interna-tional AIDS Candlelight Memorial Service an hmang a, Health & Family Welfare minister Lalrinpuii'n a hmanpui.

International AIDS Candlelight Memorial Service-ah hian Mizorama kohhran leh NGO hrang hrang aiawh te, PWNM member-te leh HIV/AIDS vei mekte an tel. HIV/AIDS veite enkawl leh ṭanpui kawnga hna an thawh ṭhat avangin ICTC head of department (HoD) Dr Lalrempuii leh Samaritan Society project director John Thansanga te hnenah chawimawina hlan a ni.

Minister Lalrinpuii chuan, HIV/AIDS vanga harsatna tâwkte ṭanpui tura PWNM an awm chu lawmawm a tih thu sawiin, "HIV/AIDS vanga thi tawhte hi hriatreng an ni a, harsatna tâwk mekte pawh an lungngaihna leh manganna hriatsak an ni," a ti a; HIV/AIDS vei mekte;'n damdawi leh ei tur ṭha zawk an neih zel theih nan theihtawp chhuah zel turin kal khawmte a chah.

Mizoram State AIDS Control Society project director Dr Jane Rinsangi Ralte pawhin thu sawiin, kohhrante'n PWNM an thlawpnaah an lawm thu a sawi a; tun aia nasa zawka HIV laka invenna leh inenkawlna lamah inzirtirna neih a ṭul thu a sawi bawk.