HUA Minister leh BJP hruaitute inkâwm

Sorkar laipuia Ministry of Power leh Ministry of Housing and Urban Affairs enkawltu minister Manohar Lal Khattar chuan May 30, Inrinni khan Aizawla BJP, Mizoram Pradesh pisa a tlawh a, Mizoram BJP hruaitute nen an inkâwm.

Inkawmnaah hian BJP, Mizoram president Dr K Beichhua, MLA leh hruaitu dangte chuan Mizoram dinhmunte an hrilh bakah, mamawhte an thlen. K Beichhua chuan, Mizoram Power & Electriity department tana Ministry of Power-in sum a pek chhuah tur a la pek lohte pe thuai turin a ngen.

Deendayal Antyodaya Yojana - National Urban Livelihoods Mission (DAY-NULM) hnuaia contract-a thawk Mizo tam takin harsatna an tawh thu te, in sak ṭanpuina, a bikin first instalment hmu tawh second instalment la hmu lo tam tak an awm thu te, in sak ṭanpuina diltu 'eligibility criteria' paltlang tawh, tun thlenga ṭanpuina la dawng lo an sawm thute an thlen bawk.

Manohar Lal Khattar chuan, Power Ministry aṭangin Mizoram tan cheng nuai 600 pek chhuah mai tur a awm thu leh, Mizoram sorkarin state matching share cheng nuai 60 a pe thei a nih chuan chawlhkar khat chhunga pek chhuah a nih tur thu a sawi.