KHAWTHLIR
Thisen pe
May 30, Inrinni khan ṬKP, Zotlang Bial, Aizawl chuan thisen pek huaihawtin, Civil Hospital, Aizawl tan thisen unit 102 an pe a, petute mipa 87 leh hmeichhia 15 an ni. KṬP, Edenthar Veng Branch-in an din champha pualin Synod Hospital tan thisen unit 39 pein, petute mipa 36 leh hmeichhia pathum an ni a; Thingsul Tlangnuam Branch YMA pawhin ZMCH tan thisen unit 53 an pe a, petute mipa 42 leh hmeichhia 11 an ni.
Kohhran upate tan training buatsaih
May 25-29, 2026 chhung khan Synod Multipurpose Training Centre (SMTC)-ah Lay Leaders' Training vawi 237-na an buatsaih a, presbytery 15 aṭangin kohhran upa 48 an tel. Lay Leaders' Training hi kohhran upate inzirna atana tih niin, kum 1996 khan ṭan a ni a, kohhran enkawl dan leh inrêlbâwlna atana pawimawh te, kohhran thlarau lam nun enkawl dante an inzir ṭhin. SMTC-ah hian vocational training - puanṭhui, computer, mobile phone chhe siam, beauty culture leh electric lam zirna buatsaih reng a ni bawk.
CM nen inkâwm
Chief minister Lalduhoma chuan May 29, 2026 khan CM Banglaah Mizoram tlawha lo zin Union Power, Housing & Urban Affairs minister Manohar Lal Khattar a kâwm a, kawlphetha lama Mizoram hmasawnna turte leh Thenzawl Peace City chungchang a sawipui. Union Minister hian Chief Minister thil thlente hi a theih anga a lo bawhzui tur thu a hrilh. CM hi Power & Electricity minister F Rodingliana'n a ṭawiawm a ni.
Hmalakna tlawh
Ministry of Rural Development joint secretary Tanuja Thakur Khalkho chuan May 29-30, 2026 khan Serchhip district-a Rural Development department hnuaia Mizoram State Rural Livelihood Mission hmalakna hrang hrang a hmunah a tlawh a, hna thawktute a kâwm. Thawktute mamawh leh harsatnate a ngaithla a; harsatna an lo thlente chu a theih ang anga chinfel dan zawnpui a tum thu a hrilh.
Gas harsatna sawiho
Serchhip DC Paul L Khuma leh District Consumer Association hruaitute chun May 29, 2026 khan Bharti Gas supply hmuh tur a awm tâk loh vanga consumer-te harsatna tawh chungchang an sawiho. Bharti Gas hi Guwahati-a hmun nei niin, April 2020 khan Serchhipah an inbun a, consumer 395 an nei. Mizoramah dealer pakua an awm a, hun eng emaw chen kal ta aṭang khan gas supply an hmuh tak loh avangin dealer-te hian harsatna an tâwk a, court-ah thubuai a kal mek a ni.
Tuiah tla hlum
Thangchungliana (36), Tlangkhua, Myanmar, Khatlaa cheng chu May 29, Zirtawpni tlai khan Tlawng luiah a tla hlum. Thangchungliana hi lènkhang zár turin a ṭhianpa nen an kal a, lènkhang an zàrna lamah a chesual a ni. Chetsual thu hriat a nih hnuah Khatla, Maubawk, Central YMA Disaster Respond Team ten ruang zawn hna an thawk a, nimin zing dar 1:10 vel khan a tlakna bul lawkah a lâng chhuak a ni. Thangchungliana hi an khuaah vui a ni ang.
Ram dang meizial man
Assam Rifles leh Customs enforcement-te chuan May 29, 2026 khan Bethlehem Vengthlanga Samuel Lalhriatpuia (30) s/o Vanlalliana hnen aṭangin ram dang meizial bawmpui (carton)177 an man a, cheng nuai 426 vel hûa chhût a ni. Assam Rifles hian May 27, 2026 pawh khan Champhai dai, Aizawl panna kawngah mi pakhat hnen aṭangin ram dang meizial báwm (case) 20 an man bawk a; cheng nuai 48 hûa chhût a ni.