Mizoram electoral roll ennawnna Special Intensive Revision ṭan a ni ta

Mizorama electoral roll leh voter-te a bik taka ennawnna, Special Intensive Revision (SIR) of Electoral Rolls, 2026 chu May 30, Inrinni khan Mizoram pumah ṭan a ni a, booth level officer (BLO)-te'n an enkawl khua leh veng ṭheuhah inziah luhna tur enumeration form an sem.

SIR 2026-ah hian May 30 aṭanga June 28, 2026 thlengin BLO-te'n an huam chhung ṭheuhah chhungkaw tin tlawhin, electoral roll-a thun dilna enumeration form an sem dawn a; May 30, Inrinni khan Mizorama khua leh veng hrang hrangah BLO-te'n form an sem ṭan a ni.

BLO-te chuan chhungkaw tin hnenah enumeration form pahnih ṭheuh an pe dawn a, copy khat chu BLO-te'n an la let ang a, copy khat dang chu chhungkua/voter-te'n an kawl thung ang.

BLO-te hian a ṭul angin voter-te chu enumeration form an dahkhahpui dawn a; enumeration form dahkhah sa chu BLO-te'n an la khawm leh ang. Enumeration form-ah hian electoral roll-a chuangte pawh ziah luh vek tur a ni.

Tun dinhmunah Mizoram Electoral Roll-ah voter 8,75,068 an awm mek a, mipa 4,23,397 leh hmeichhia 4,51,671 an ni.