AMC-in an subject hrang hrang zir chiangtu tur study team a din

Aizawl Municipal Corporation chuan AMC Executive Council ṭhukhawmin an lo rel tawh angin, AMC-in a khawih thil (subject) chi hrang hrangte zir chiangtu tur study team pakua a din a, thla hnih chhung hun pek an ni.

Study team hi May 20, 2026 khan din niin, team tinah executive corporator-te chairman an ni a, secretary chu an subject zir chian tura incharge officer (AMC)-te an ni. Member-ah corporator zawng zawng leh AMC officer-te sem darh an ni a; July 20, 2026 ral hmain team-te chu report thehlut tura tih an ni.

Team hrang hrangte chuan AMC Executive Council meeting-a pharh tur report leh rawtna an neihte thla hnih chhungin an thehlut dawn a; AMC Executive Council meeting-in a pawm hnuah Board of Corporators meeting-in a pawmpui turin pharh leh a ni ang.

AMC hotute chuan, study team din a nih avang hian AMC inthlan dawna ZPM manifesto-te an hlamchhiah phah dawn lo a, manifesto-te tihlawhtling turin hma an la nghal a, AMC sorkar chuan manifesto tihhlawhtlin chu a ngaih pawimawh hmasak a nih thu an sawi.

Study team din hi AMC-in mipui tana ṭha zawk leh awlsam zawka hna a thawh theih nan leh AMC chak zawk leh langtlang zawk a awm theihna atana ruahmanna pakhat a nih thu an sawi a; AMC kalphung awm saa a ṭha laite chu kalpui zel tur a nih rualin, study team kaltlanga kalphung ṭha zawk chhawp chhuah ngei tum a nih thu an sawi bawk.