Thlai hralhna ṭha ngaih pawimawh a ṭul - Larsap
India ram puma June thla chhunga hman tur 'Khet Bachao Abhiyan' chu nimin khan Lok Bhavan-ah larsap Gen. Dr Vijay Kumar Singh-a'n a hawng. Larsap chuan, thlai hralhna ṭha ngaih pawimawh a ṭul thu a sawi.
Governor chuan, Mizoram chu agriculture sector-a innghat nasa tak a nih thu a sawi a, "Mithiamte leh KVK-te ráwn chunga theihtawp chhuaha hma kan lak phawt chuan ei leh barah kan intodelh mai bakah, kut hnathawktute sum lak luh a pung thei dawn a ni," a ti.
Thlai hralhna ṭha market linkage ngaih pawimawh a ṭul thu sawiin Larsap chuan, "Thlai hrisel leh ngaihhlutawm organic thlai thar tamah ṭan lak lehzual a ṭul," a ti a; Khet Bachao Abhiyan chuan rah ṭha a chhuah ngei a beisei thu a sawi.
Gen. VK Singh chuan, chemical fertilizer chungchang sawiin, "Thar tam duh vanga nasa taka chemical fertilizer leh rannung thahna hlo hman ṭhinte'n ram leilung leh hriselna thlenga nghawng ṭha lo a thlen a, hemi laka kan him theih nan a taka ke kan pên chhuah a ṭul tawh a ni," a ti.
Loneih dan leh thar chhuah a him zawk theih nan leilung mila loneih chawi lâr zual zel a ṭul thu sawiin Larsap chuan, "Thlaite'n an mamawh khawp chaw ṭha an dawn theih nan lei endikna neih hmasak a pawimawh," a ti a; agriculture mithiamte chu ṭhahnemngai taka loneitute pui turin a chah.
Inkhawmah hian Central Agriculture University, Imphal vice chancellor Dr Anupam Mishra chuan 'Khet Bachao Abhiyan' chungchang a sawifiah.
Khet Bachao Abhiyan hi Ministry of Agriculture and Farmers' Welfare kaltlanga lei da zel tur venna atana hmalakna a ni a; lei tak dan zir chian hmasak hnuah inpawlh rual leh him zawk hmanga leiṭha hman bakah, leilung nena inrem taka loneih ngaih pawimawh a ni.
Chemical fertilizer, a bikin urea hman leh leiṭhaa innghah nasat tihtlem tum a ni a; June 2026 chhungin agriculture scientist, KVK official leh state aiawhte'n seminar leh a taka entirnate neiin loneitute an zirtir ṭhin dawn a ni.