Ruihhlo donaa hman atan Minister-in Central YMA hnenah lirthei 6 a hlan

Excise & Narcotics minister Lalnghing-lova Hmar chuan nimin khan END Commissionerate conference hall-ah ruihhlo donaa hman tur Bolero Camper leh Eeco van pathum ve ve Central YMA hnenah a hlan. Minister chuan, mahni theihna zâwnah theihtawp chhuah a nihin ramin a chhawr ṭhin thu a sawi.

Lalnghinglova Hmar chuan, ruihhlo donaah pawl hrang hrangin an tih theih leh ṭhatna zawn te, an neihte a inang lo tih sawiin, "Kan theihna zâwnah, kan hun lai ṭheuha theihtawp kan chhuah hian kan ramin a chhawr a, Mizoram tan a hlu. Mahni insêngsoa ruihhlo donaa hma la ṭhin CYMA hotute chungah lawmthu kan sawi a, sorkar leh mipuiin YMA hi an thlamuanpui a ni," a ti.

Sorkar hmalakna hrang hrangah mipuiin neitu rilru an put loh chuan hlawhtlin a har tih sawiin END Minister chuan, “Tourism leh sports-ah pawh kan infrastructure ṭhahnem tak chu public private partnership kaltlangin mimal leh pawlin an enkawl mek a, PPP hi uar chhoh zel kan tum," a ti a; ruihhlo donaah pawh tun aia hmasawn tur chuan department, YMA leh mipui an ṭanrual zel a ngaih thu a sawi.

CYMA president R Lalngheta pawhin thu sawiin, END leh CYMA inkara thawhhona ṭha tak a awm thu a sawi a, “Thawhhona ṭha zawk kan neih zel ka beisei a, dan hriatna chungchang leh thil dangah pawh department-in min finchhuah zel ula, a ṭul chuan zilhhauna dawng turin an inhawng reng a ni," a ti.

CYMA hnena lirthei pek hi Ministry of Home Affairs hnuaia Narcotics Control Bureau aṭanga hmuh a ni a, CYMA hnenah hian lirthei pakua, Bolero Camper paruk leh Eeco van pathum pek tura ruahman a ni. Nimin khan lirthei paruk inhlan niin, Bolero Camper dang pathum chu kawngah a la thang mek a; March 15, 2025-a Union Home Minister-in Mizoram a rawn tlawh ṭuma CYMA-in dilna an thehluh kal zel aṭanga lei a ni a; Ministry of Home Affairs thurawn angin dilna hi END kaltlangin thehluh a ni. January 21, 2026 khan Bolero Camper paruk leh Maruti Eeco van pathum lei nan hian cheng nuai 88.95 phalna hmuh a ni.