Pangang chaw tur búl ṭiak 16,000 vailiam

Sericulture minister Lalthansanga chuan nimin khan Sericulture Directorate aṭangin Bána Kaih hnuaia Keifang leh Mualphenga Muga Project atan chhungkaw 60 phun tur búl ṭiak 16,000 a vailiam.

Sorkar thuchhuah tarlan danin, Muga silk siamna tur Muga pangang project bul ṭanna atan Saitual district-a Keifang leh Mualpheng khuaa chhungkaw 60 thlan an ni a, ram acre 61 vela zauah phun tur a ni. Bána Kaih hnuaiah Sericulture department leh Mizoram Khadi and Village Industries Board ṭang dun hmalakna a ni.

Lalthansanga chuan, búl phunna tur project chu cheng vbc 4.9 hu a nih thu sawiin, "Mahse, pawisa a lo lut zung zung lo. Heti chunga Department leh MKVI ten sum thawha lo vahna leh khur laih te endika pawisa an lo pe zel hi he hmalakna hian loneitu rethei zawkte a thleng phak tih a tarlang. Mipui tana ding kan ni a, chu chu kalphung thar, mipui sorkar chu a ni," a ti a; ram nei lo, harsa zawkte dâwm kân an ngaih thu a sawi.

MKVI Board chairman C Lalremliana chuan, búl ṭiak chu Central Silk Board, Boko, Guwahati nursery aṭanga lak a nih thu a sawi a, "Him dak vekin a lo thleng a, him taka a hmun a thlen vek kan beisei. Mi 60 thlante hian pakhatin ṭin khat hmunah ṭiak 650 zelin bul an ṭan ang," a ti.

Tarlan danin, Som ṭiak hi kum 3 vel chhungin a puitling thei a, a puitlin rualin Muga silk pangangte a kungah dah a ni dawn. Muga pangang cocoon chu kg khat Rs 30,000 - 40,000 inkar man a ni.