Lalrinpuii'n Serchhipa hmunhmate a tlawh

Health & Family Welfare minister Lalrinpuii chuan nimin khan Serchhipa District Hospital leh Mercy Hospital bakah, Health department hmalakna hrang hrang a tlawh a; district tinah rualbanlote leh rilru lam buaite enkawlna hmun bik dah tura hmalak mek a nih thu a sawi.

Health Minister chuan, Serchhip District Hospital thar sak mek a ni chu a lawm thu a sawi a; CSR sum chungchangah Power Grid Corporation of India Limited lamin MoU an la ziah theih loh thu sawiin, "Mizoram sorkar lam chuan kan tih tur chin kan tifel vek tawh a, PGCIL lamah pawh chak taka bawhzui zel kan tum," a ti.

Lalrinpuii chuan, PGCIL CSR sum bakah, NESIDS aṭanga sum hmuh turte hmuh thuai a nih theih nan thuneitute hnenah bawhzui a nih dawn thu te, Aizawl district-ah chauh ni lo, district tina rualbanlote leh rilru lam buaite enkawlna hmun bik dah turin hmalak mek a nih thute a sawi bawk.

Health Minister hian New Serchhip Bazar Venga Mercy Hospital (Rural Diagnostics & Research Centre) a tlawh a; New Serchhip khawtlang hruaitute nen inkâwmin, mipui vantlang hriselna kawnga hmalakna tur leh Urban Primary Health Centre leh sub-centre-te tihhmasawnna tur leh mipui tana ṭangkai lehzuala hman a nih theih dan turte an sawiho a ni.