Central thupek leh dan zawm loh vangin Mizoramin vbc. 11,808 a chán dawn em?

Mizoram sorkar chuan The Mizoram State Lottery aṭanga kum thum chhung, 2012-2013 aṭanga 2014-2015 inkara an sum hmuh tur cheng vbc. 11,834.22 aṭangin cheng vbc. 25.45 chiah an la hmu a, sum hmuh loh zat chu vbc. 11,808.77 a ni.

Assembly session neih zawh taka Finance minister Lalsawta'n a pharh, Comptroller and Auditor General (CAG) of India buatsaih Perfomance Audit of Mizoram State Lotteries-a a lan danin, Mizoram sorkarin lottery aṭanga sum a hmuh tur ang a hmuh loh chhan bulpui ber chu Lotteries (Regulation) Rules 2010 leh Union Home Ministry thupek a zawm loh vang a ni.

Lotteries (Regulation) Rules 2010 dan leh Union Home Ministry thupek ang chuan, lottery ticket hi hralh a nih veleh distributor/selling agent-te'n state sum báwm (consolidated fund)-ah engmah la hêk loin an dah tur a ni.

Mizoram sorkar chuan Union Home Ministry ruahmanna leh Lotteries (Regu-lation) Rules 2010 chu zâwm loin, Minimum Guaranteed Revenue (MGR) an hmang a; chumi hnuaiah chuan per draw/per scheme-ah cheng nuai 36.2 thehluh tur a ni.

MGR hmang hi chuan lottery ticket hralh tam leh tlemin distributor/selling agent-te'n state consolidated fund-a an sum chhûn luh turah kawng ro a su lo. Distributor-te chhiah hmuh zat khuahkhirh a ni lo a, state sum dawn tur erawh khuahkhirh a ni thung.

Union Home Ministry ruahmanna hi Mizoram sorkarin zawm se chuan, kum 2012-13 leh 2014-15 inkar chhunga lottery distributor/sell agent-te'n Mizoram sum báwma an chhun luh tur chu cheng vbc. 11,834.22 a ni a; mahse, Mizoram chuan MGR a hman avangin distributor/sell agent-te chuan cheng vbc. 25.45 chiah an chhung lut a ni.

Mizoram sorkar leh distributor/sell agent-te inremna siam ang chuan, distributor/sell agent-te'n pawisa an pek tlai vanga hrem theihna emaw, state pawisa chàn tur humhimna atana distributor/sell agent-te thunun theihna a awm lo.

The Mizoram State Lottery kalphung

4 Chief Secretary kaihhruaina hnuaiah State Lottery Committee (SLC) din a ni a, member-te chu Finance Commissioner, Law & Judicial Secretary, Institutional Finance & State Lottery Director.

4 Lottery ticket chu state sorkarin amahin a zuar emaw, distributor/sell agent-te a zawrhtir thei a, distributor/sell agent tur thlanna atana zawm tur dan duan chu state kut a ni.

4 Distributor/sell agent tur thlanna atan March 2011 khan Invitation for Expression of Interest (IEI) koh a ni a, firm 13-in an chhang a, Court thubuaite a awm hnuah IEI chu sût a ni.

4 December 2011 khan IEI chhuah leh a ni a, IEI hmasa-a chhangtu 13 zinga pakuain an chháng tawh lo. An chhan loh chu chu minimum assured revenue depost hun tur tarlan loh vang te, agreement sign hun ziah loh vang te, draw hmasa ber hun tur tarlan loh vangte etc. a ni.

4 December 2011-a IEI chhuah hi NV International, Summit Online Trade Solution Pvt. Ltd., E-Cool Gaming Solution leh Tessta Distributor-te'n an chháng.

4 Tessta Distributor hian paper draw an chháng a, draw khat Rs. 10,000-in an chháng. A bak pathumte chuan online draw chhangin, draw khat Rs. 10,000 ṭheuhin an chhang.

4 March 18, 2012-a SLC ṭhukhawm chuan Mizoram state lottery kalpui tura firm palite chhànna an pawm a, a ṭul ang zela kum hnih atana pawhsei turin rawtna an siam. SLC rawtna hi sorkar chuan May 23, 2012-ah a pawm.

4 Sorkarin SLC rawtna a pawm hnu hian Institutional Finance & State Lottery leh firm-te remtihnain per draw Rs. 10,500-ah tihsan a ni.