RL Thanmawia hnenah Academy Award hlan

Mizo Academy of Letters (MAL) chuan Inrinni khan IPR Auditorium-ah Annual Meeting an hmang a, minister of state Lalrinmawia Ralte-in a hmanpui. MAL chuan Prof. RL Thanmawia hnenah MAL Academy Award an hlan.

Lalrinmawia Ralte chuan, ṭawng siam ṭhaa tihausa turin thu leh hla lama tui mite an pawimawh tih sawiin, ziak mite, hla phuah thiamte leh thu sawi ṭhinte'n ṭawng tihausa turin awmzia an nei thui hle tih a sawi a, "Mizote hian mahni ṭawnga ziak leh chhiar kan neihna a la rei lo hle chungin, kan thuziak leh ṭawng a ṭhang nasa. Chutih rualin, social media-ah a tâwi zawng leh spelling dik loa thu ziak kan chîn avangin thui tak kan ṭhan tawhna hi min tiṭhuanṭhu leh ang tih a hlauhawm," a ti.

Inkhawmah hian MAL chuan kum thum dana an pek
ṭhin, Academy Award chu Prof. RL Thanmawia hnenah an hlan a; Award hian thuziak leh Rs. 10,000 a keng. Khuallian chuan Prof. RL Thanmawia lehkhabu ziah, 'Zanlai Thlifim' (Ka hla phuahte) tih a tlang-zarh nghal.

MAL Annual Meeting leh Academy Award hlanna inkhawm hi an president Lal-thangfala Sailo-in a kaihruai a; MAL Secretary, Treasurer, Thu leh Hla Editor leh Academy Award Committee Secretary te report an pe a ni.

Prof. RL Thanmawia hi kum 1954-ah Darlâk khuaah a piang a, a pa chu Vanlalliana a ni. Mizoram Universiry Mizo department-ah professor a ni a, tunah hian MZU-ah Controller of Examinations a ni mek.

Prof. RL Thanmawia hi Mizo poetry chungchanga doctorate degree hmu hmasa ber a ni a; hla 90 chuang a phuah tawh a, lehkhabu 25 bakah article ṭhahnem tak a ziak tawh a; a nupui fanaute nen Ramhlun South-ah an chêng mek.