KHAWTHLIR

Thisen pe

December 10, 2016 khan Luangmual Branch KṬP-in Synod Hospital tan unit 25 an pe a; Khatla East Branch KṬP-in an din champha kum 10-na pualin Aizawl Civil Hospital tan unit 34 an pe. TKP Lunglei Rahsi Veng bialte'n Christian Hospital, Serkawn tan unit 42 an pe a, Lawngtlaia TKP Kannan Unit (AOC Veng)-in Lawngtlai District Hospital tan unit 18 an pek bakah, Aizawla Vaivakawn ṬKP-te'n Krismas present atan Aizawl Civil Hospital-ah unit 10 an pe bawk.

Serthlum huan en

Horticulture minister PC Lalthanliana chuan, Inrinni khan Hualtu khuaa serthlum hlawhtlinpuitu, Thanzauva serthlum huan a tlawh a; Horticulture director R Zotawna'n a ṭawiawm. PC Lalthanliana chuan, "Kut hnathawktu hlawhtling khawpa taima leh tih tak taka tite hi sorkarin a hre hle a, hun remchan dan azirin a hmuna tlawh zel hi kan duh dan a ni," a ti. Thanzauva hian kuminah serthlum aṭangin Rs. 3,00,000 vel a la lut dawn niin an sawi.

MLA-in hawng

Lawipu khelmuala pavillion, cheng nuai 10 sénga sak leh Bungkawn Vengthar branch MHIP building, Rs.1,50,000 sênga sak chu Inrinni khan bialtu MLA Vanlalzawma'n a hawng. Pavillion leh MHIP building-te hi Aizawl West-III MLA Local Area Development Fund hmanga sak a ni.

Chawimawina hlân

Mizo Students' Union (MSU) sub-headquarters, Thingsai chuan, Inrinni khan Art & Culture Complex, Berawtlangah an khaw mi, kumina BA leh MA pass-te leh prominent citizen-te hnenah chawimawina an hlan a, bialu MLA John Siamkunga'n a hmanpui.

LDDF din

Lunglei district hmasawnna atana thawk tur, Lunglei District Development Forum (LDDF) chu Inrinni khan din a ni a, president-ah C Lalchhuana leh general secretary-ah Eric R Zomuanpuia ruat an ni. LDDF hnuaiah hian wing pali siam a ni.

Car-in mi 1 su hlum

Inrinni zan dar 6 vel khan Thenzawl bul kawngpuiah, Lunglei aṭanga Aizawl pana tlân car MZ-01 C-7878, Anthony Zothanmawia, Lunglei Zohnuai khalh chuan kawngpuia kal mistiri Sokai Ahmed (28) s/o Yasin Ali, Fukiramgram, Karimganj chu a sû a, ka chhawn lohin a thi. Anthony Zothanmawia hi Thenzawl Police-te'n an man nghal a; Sokai Ahmed-a ruang chu nimin khan Thenzawl damdawi-ina endik a nih hnuah an khua panpui a ni.

UPC inkhawmpui a tiak

Mizoram UPC inkhawmpui lian pahnih - General Mission Conference leh General Assembly vawi 22-na, December 7, 2016 zana Zonuama an Assembly Centre-a ṭan chu nimin khan chhunzawm a ni a, zanah a ṭiak.

General Assembly rorel inkhawm chu executive chairman Upa Lalzir-liana'n a kaihruai a; kum 2017 budget atan Rs. 9,28,08,000 an pawm. Inkhawmpui hmang tur hian India ram hmun hrang hrang bakah, USA
aṭangin palai an kal a ni.